Manamnama a ti Central Luzon ti makaawat ti kadaklan a bingay iti ₱33-billion nga alokasyon iti farm-to-market (FMR) roads manipod iti ₱6.793-trillion a naisinagsing a national budget para ita a tawen.
Maibasar iti 2026 General Appropriations Bill nga inaprubaran iti Bicameral Conference Committee, dumanon iti ₱4.89 billion ti mailatang iti Central Luzon a mangsaksaklaw kadagiti probinsya iti Aurora, Bataan, Bulacan, Nueva Ecija, Pampanga, Tarlac, ken Zambales.
Maikadua met iti addaan ti kadaklan nga alokasyon ti Eastern Visayas wenno Region 8 a ₱4.4 billion, maikatlo ti Cagayan Valley wenno Region 2 a ₱3.78 billion, maikapat ti SOCCSKSARGEN wenno Region 12 a ₱3.57 billion, ken maikalima ti Calabarzon wenno Region 4-A a ₱2.65 billion.
Kabayatanna, maikainnem ti Ilocos Region wenno Region 1 a ₱1.84 billion, maikapito ti Northern Mindanao wenno Region 10 a ₱1.56 billion,maikawalo ti Bicol Region wenno Region 5 a ₱1.51 billion, maikasiam ti Davao Region wenno Region 11 a ₱1.5 billion, ken maikasangapulo ti Western Visayas wenno Region 6 a ₱1.43 billion.
Dagiti met lima nga addaan iti kababaan nga alokasyon ket pakairammanan iti Central Visayas wenno Region 7 a ₱1.31 billion, Zamboanga Peninsula wenno Region 9 a ₱1.22 billion, Cordillera Administrative Region a ₱939.7 million, Caraga wenno Region 13 a ₱798 million, ken maudi ti Mimaropa wenno Region 4-B a ₱480 million.
Maipalagip nga agingga laeng inton January 5 ti impanamnama ti opisina ni President Ferdinand Marcos Jr. a patengga ti panangrepasona iti 2026 para iti panakapirma daytoy.
