Pinaikkat ti Korte Suprema iti serbisyo ti gobierno ni Atty. Jurgens nga SJ. Milan, Clerk of Court V ti Regional Trial Court idiay La Trinidad, Benguet, gapu iti a “grave misconduct,” “dishonesty,” ken aramid a mapaapektar iti pagimbagan ti serbisio.
Malaksid iti dayta, na-disbar pay daytoy kas maysa nga abogado.
Naduktalan ti Korte a ni Milan ket maulit-ulit a nagkiddaw ken nakaawat iti kuarta, saan nga umno a panangimaneharna iti titulo ti daga a naitalek kenkuana, siuulbod a nangibaga a mabalinna nga impluensiaan dagiti proseso ti korte, ken sinalungasingna dagiti pagalagadan ti ethical standards a mangiturturay kadagiti personnel ken abogado ti korte.
Nagtaud ti desision manipod iti reklamo ni Shirley K. Tiwaken, a nangakusar kenni Milan nga inabusona ti posisionna bayat a clerk of court ken sigud nga officio sheriff daytoy.
Naduktalan ti Korte a ni Milan ket nagkiddaw ti ₱10,000 para iti panangidulin ti tallo a titulo ti daga, nagkolektar pay iti ₱35,000 para met iti mapapati a follow-ups, ken nagkiddaw manen iti kanayunan a ₱25,000 kalpasan nga ulbod ti panangibagana a naipaulogen ti desision ti korte.
Dagiti nasao nga inaramid ni Milan, sigun iti Korte, ket “bribery” ken “grave misconduct.”
Mainaig iti dayta, naduktalan pay ti Korte a saan nga inkankano ni Milan dagiti maulit-ulit a direktiba manipud iti Office of the Court Administrator a mangisubmitir iti komentona maipapan iti reklamo, a nasurok a dua a tawen ti kasapulan tapno tungpalenna.
Gapu iti dayta, impataw ti Korte ti multa a ₱18,000, a sigun iti Korte, ti pannakaitantan ket katukad iti “insubordination” ken saan a panagtulnog ti korte.
Impalagip manen ti Korte Suprema kadagiti klerk a ti pangabuso ti posisionda ket mangdadael iti panagtalek ti publiko iti Judicial.
