BAGUIO CITY – Inyunay-unay ni Hadji Adam Banaga, Barangay Kapitan ti Malcom Square iti siudad ti Baguio a saan a nagbalin nga “Obstraction” dagiti vendors iti lobby ti Maharlika Livelihood Center.
Sigun kenkuana, masya daytoy kadagiti vendor ken suportado iti anyaman a pagsayaatan ti nasao a pasdek.
Nupay kasta, saanda a ninamnama a maiyakar dagitoy iti 6th Floor ti Livelihood Center.
Sigun kenni Banaga, nabigla dagitoy iti maatap a kinuna ni Arthur Allad-iw, administrator ti Maharlika Livelihood Center nga “Obstraction” dagiti sumagmamano a vendors.
Immuna met nga inlawlawag ni Allad-iw a dimmalan iti konsultasion ti nasao a pannaka-iyakar dagiti agarup 39 a vendors.
Sigun iti administrator ti Maharlika Livelihood Center, Oktubre 2025 a naipaulog ti Memo a maiyakar dagiti kinunana nga “obstruction stalls”.
Nupay kasta, nagkiddaw dagiti maseknan a vendors iti pawayway nga agingga intun Disiembre paylaeng dagitoy; kiddaw a pinatgan dagiti maseknan nga opisina iti suidad ti Baguio.
