Imbutaktak ni Caloocan 2nd District Representative Edgar Erice nga adda dagiti kongresista nga agpangpanggep a pilaan iti impeachment complaint ni President Ferdinand Marcos Jr.
Sigun kenni Erice, nakaawat daytoy ti impormasyon seknan iti nasao a tignay a posible a maaramid bayat ti panagsubli ti session iti Kamara inton Pebrero.
Nupay kasta, saan pay nga innaganan ni Erice dagiti kongresista a karaman iti mapangpanggep a panakaipila iti impeachment complaint kontra iti presidente.
Iti agdama, saan pay maibaga ti opisyal nu makaala ti umdas a suporta ti nasao a tignay kontra iti presidente manipod iti Kongreso.
Malaksid iti dayta, posible metlaeng a maipilaan iti sabali manen nga impeachment complaint ni Vice President Sara Duterte iti kapada metlaeng a bulan nangruna ket naitudingen nga ag-expire ti one year bar rule dagiti immunan a naipila nga impeachment complaint kontra kenkuana.
