Impetteng iti Land Transportation Office (LTO) a mabalin a maipaayan iti pannusa dagiti traffic enforcers ken deputized agents daytoy nu saanda a bigbigen dagiti government-issued electronic driver’s license (eDL).
Sigun kenni LTO Chief Assistant Secretary Markus Lacanilao, rumbeng a maakseptar dagiti electronic driver’s license kas valid alternative nu saan a pisikal a maipakita dagiti motorista ti lisensya dagitoy kadagiti checkpoints ken panakapasardeng kadagiti kalkalsada.
Daytoy ket gapu ta addan ti eGov ken EMS portals a mabalin a pakakitaan kadagiti driver’s license.
Gapu iti dayta, imbalakad ti opisyal kadagiti motorista nga ireport dagitoy dagiti enforcers a saan a mangbigbig kadagiti ipakitada nga electronic driver’s license.
Kasapulanda laeng nga alaen ti nagan ken ID ti enforcer sakbayda nga agturong iti LTO tapno maaksyunan.
Kabayatanna, inlawlawag ti nasao nga opisina nga iti baet a mabigbigbig dagiti electronic driver’s license ket saan latta a maakseptar dagiti screenshots wenno printed copies dagitoy rason a kasapulan dagiti motorista a lukatan ti eGov wenno LTMS portal sakbayda nga iprisinta dagiti digital a lisensya dagitoy.
