Determinado ti maysa kadagiti pet owners dagiti naibelleng a bagi dagiti natay nga aso ken pusa idiay Bulacan a mangipila iti kaso kontra iti crematorium idiay Bacoor, Cavite a nangitalkanna iti pimmusay a tarakenna.
Maysa ti taraken daytoy nga aso a ni Ivy kadagiti nadiskobre a 25 a natay nga aso ken pusa a naibelleng lattan iti igid ti kalsada idiay Bulacan.
Sigun iti report, nailasin ti makinkukua ti langa ken itsura ni Ivy iti nagviral a social media post. Dagosda met daytoy nga inala ken inturong iti sabali a crematorium no sadino naggastos iti nasurok P10,000.
Maipalagip nga idi napalabas a lawas, nadiskobre ti bagi ti natay a 22 nga aso ken tallo a pusa iti igid ti kalsada idiay Bulacan.
Kabayatanna, nangipatungpal ti lokal a gobyerno ti siudad ti Bacoor iti meeting kadua ti pulisya, makinkukua iti crematorium, ken agarup 30 a pet owners.
Sigun iti report, napaay ti makinkukua iti crematorium a mangipakita kadagiti CCTV footages, ken dokumento a mangpaneknek a pudno nga impatungpalda ti cremation kadagiti ayop a naitalek kadakuada.
Naduktalan metlaeng a saan a saklaw ti business permit ti nasao a crematorium ti animal cremation services.
Mannarimaan metten ti panangimbestiga ti Business Permits and Licensing Department ti siudad iti nasao nga establisyimento.
