Kinondenar ni sigud a presidential spokesperson Atty. Harry Roque ti sumagmamano a bulanen a panangibalud ti International Criminal Court(ICC) kenni sigud a president Rodrigo Duterte iti baet nga agparparang a kurang dagiti ebidensya ken good grounds laeng ti adda.
Sigun kenni Atty.Roque, saan nga aramid ti natino nga institusyon ti mangibalud iti maysa nga indibidwal a saan nga umdas ti iggemna nga ebidensya.
Kagiddan ti panangkwestyunarna iti panangibalud ti ICC iti sigud a presidente ket kwinestyunaranna metlaeng ti saan a panangipaay iti international tribunal iti kidkiddawen dagitoy nga interim release.
Inladawan ti nasao nga abogado a ti mapaspasamak ket maysa a dakkel nga iskandalo.
Maipalagip nga idi napan a lawas, immapela ti International Criminal Court (ICC) kadagiti kameng iti pulisya iti Pilipinas a tumestigoda kontra kenni sigud a president Rodrigo Duterte.
Iti statement nga impablaak iti international tribunal, kidkiddawenna ti direkta a panagtestigo dagiti kapulisan mainaig iti kaso a crime against humanity a sangsangwen ti sigud a presidente.
Kagiddan dayta, nangipaay metlaeng daytoy iti online form a mabalin a pangipaayan dagiti testigo kadagiti reklamo dagitoy.
