Karaman a pimmusay iti napasamak a plane crash ti deputy chief minister iti Maharashtra state idiay India a ni Ajit Pawar.
Malaksid kenni Pawar, pimmusay metlaeng ti tallo pay a kakadwana a nakalugan iti nag-crash a chartered nga eroplano agsapa idi kalman.
Kalpasan ti insidente, indauloan ni Prime Minister Narendra Modi ti panakaipaay ti tribute kenni Pawar nu sadino, inladawanna a ti ipupusay daytoy ket “shocking and saddening.”
Kagiddan dayta, pinadayawanna ti panagserbi ni Pawar iti publiko nangruna dagiti residente iti Maharashtra.
Ibilbilang met ni Maharashtra Chief Minister Devendra Fadnavis ti ipupusay ni Pawar nga “an immeasurable loss.”
Kabayatanna, naipakaammo ti tallo nga aldaw a panagladingit iti nasao nga estado bayat nga ita nga aldaw ti funeral ti nasao nga opisyal.
Ni Pawar ket maysa kadagiti nabileg a pulitiko iti estado ti Maharashtra nu sadino, maysa daytoy kadagiti kangrunaan a miembro iti Nationalist Congress Party.
