Impudno ti National Police Commission (Napolcom) a ginandat ni Charlie “Atong” Ang nga impluwensyaan ti administrative investigation dagitoy iti pakainaigan dagiti kameng ti pulisya iti kaso dagiti missing sabungero.
Sigun kenni Napolcom Executive Officer Rafael Calinisan,immawag ni Ang iti saanen nainaganan nga indibidwal nga asideg kenkuana idi July 12, 2025 ken ginandat ti negosyante a makitulag tapno maisardeng ti imbestigasyon maipapan iti kaso dagiti maseknan a pulis.
Inaklon ni Calinisan a nainsulto daytoy iti inaramid ni Ang nu sadino,impettengna a nupay adu ti kwarta ni Ang ket saanna a kabaelan ida a bayadan ken saan a mailaklako ti hustisya.
Maipalagip a naimbestigaran ti pakainaigan dagiti partikular a kameng iti pulisya kalpasan nga imbutaktak ti whistleblower a ni Julie “Dondon” Patidongan ti pakainaigan dagitoy iti panagpukaw dagiti mammallot.
Kinuna ni Patidongan a binayadan ida ni Ang nga i-kidnap ken papatayen dagiti mammallot a maatap a nagkusit iti ay-ayam.
Kabayatanna, ita laeng a bulan ket inikkat ti Napolcom ti 11 a kameng iti pulisya gapu iti akusasyon kontra kadakuada.
Mainaig iti dayta, kinuna ni Calinisan nga ita laeng nga impakaammona ti nasao a ginandat ni Ang para iti transparency ken gapu ta ti kaso iti pakainaigan dagiti kameng iti pulisya iti missing sabungero ket nagleppasen.
