Manarimaan ti panangpapigsa ti lokal a gobierno ti Bontoc, Mountain Province ti Adolescent Health Development (AHD) Program babaen iti Information, Education, and Communication wenno IEC activities kadagiti agtutubo tapno malapdan iti panagngato iti teenage pregnancy.
Sigun kenni Provincial Population Officer Eunice Andaya, maisaysayangkat dagiti aktibidad kaduada ti Department of Education a sinuportaran iti Philippine National Police.
Mangisaysayangkatda iti IEC sessions iti junior ken senior high schools ken mangipapaayda kadagiti materiales kadagiti teen center tapno maipasigurado nga adda iti umno a pannakaamo dagiti agtutubo seknan iti reproductive health.
Kinuna metlaeng ni PMaj. Faith A. Igualdo iti PNP Women and Children Protection Desk a mairamraman ti maipapan iti teenage pregnancy awareness iti kampaniada.
Maibasar iti datos iti Philippine Statistics Authority–Mountain Province, nailista ti 251 a teenage mothers idi tawen 2024—nangatngato iti 10.1% nu idilig iti 228 a kaso idi tawen 2023. Kaaduan ket iti Paracelis nga addaan iti 99 a kaso, sinaruno iti Bauko nga addaan iti 59, ken sag-22 idiay Bontoc ken Natonina. Adda metlaeng iti tallo a 13-anyos a naganak ken adda dagiti kaso a kanayon nga agdadagsen kadagiti agtutubo nga agtawen iti sangapulo ket innem.
Gapu iti dayta, impaganetget ni Andaya ti kinapateg ti natibker a koordinasion kadagiti ahensia ken isingsingasingda ti panangbukel iti maysa nga Adolescent Health Council tapno mapapigsa pay ti kampania kontra iti teenage pregnancy.
