Namulta iti P100,000 ti maysa a drayber iti lokal a gobierno kalpasan a napaneknekan a “gulity” wenno nagbasol iti kaso nga animal cruelty gapu iti brutal a panangpapatayna iti maysa nga aso idiay Sadanga, Mountain Province.
Maibasar iti report, ti insidente ket napasamak idi Disiembre 4, 2025 idiay Barangay Saclit nu sadinno maysa nga American Bully nga agnagan iti Axle ti napangpang-or agingga a pimmusay usar ti maysa a kayo.
Iti nagwaras a video iti social media, maimatangan ti maulit-ulit a panagpang-or iti suspek iti aso bayat nga adda ti sumagmamano a nakasaksi.
Pinadas pay iti aso a tumaray ngem kinamat pay daytoy iti suspek ken pinang-orna pay agingga nga ad-adda a natay.
Sigun kadagiti report, nangrugi ti insidente kalpasan a nagisbu ti aso iti suspek, a mapapati a mainaig iti pammati iti sumagmamano nga indibidual a “malas” ti inaramid ti aso.
Kasaruno iti insidente, nangipila iti reklamo ti pulisia kadua ti Furvent Animal Rescue and Advocacy iti sidong iti Animal Welfare Act kontra iti suspek a maysa a drayber iti LGU.
Itay laeng nabiit, inwaragawag ti grupo a nangsuporta iti kaso ti pangngeddeng ti korte nu sadinno napaneknekan a “guilty” ti suspek ken namulta iti ₱100,000.
Sigun iti animal welfare group, saan nga umdas ti pannusa tapno maitukad ti panagsagaba iti aso, ngem patienda a napateg daytoy nga addang tapno pabasulen ken maipatungpal iti linteg kontra iti panangabuso iti ayop.
