CORDILLERA- Pagdandanagan ti Alliance of Concerned Teachers – Cordillera Union (ACT CAR-UNION) ti posible a pannakaipatungpal ti Trimester system ti Department of Education (DepEd)
Iti interview ti Bombo Radyo kenni Allience of Concerned Teachers – Cordillera President Joel Capulong, kinunana a saan a ti Trimester ti solusyon tapno mabawasan ti non-teaching loads dagiti manursuro iti pagilian.
Sigun kenkuana, aksionan ti DepEd ti kinakurang dagiti silid pagadalan, manursuro ken guidance councilor no panggepda a bawasan ti dadagsen dagiti mannursuro.
Innayonna pay a kasapulan metlaeng nga urnusen ti nasao nga ahensia ti student ratio.
Maipagip nga iti sidong ti naisingasing a trimester system, mangrugi ti first trimester iti June agingga September; September agingga December ti second trimester bayat a ti third trimister ket mangrugi met iti January agingga iti March.
Tunggal term ket pakairamanan ti opening block, instructional block ken enrichment block.
Inlawlawag ni Capulong a panggep ti DepEd nga ipatungpal daytoy tapno maipamaysa ken saan a masinga ti klase dagiti estudiante gapu iti ar-aramiden dagiti manursuro a non-teaching task.
Nupay kasta, kinuna ni Capulong a saan a daytoy ti kangrunaan a solusyon no diket ti pannakaipaay ti aksionan kadagiti pagkurangan daytoy.
Inyunay-unay ti nasao a manursuro a nasayaat no marisut pay nga umuna dagiti nabayag a parikot ti DepEd, sakbayda a mangipatungpal iti sabali manen nga addang.
Impetteng ni Capulong nga agingga a saan paylaeng a narisut dagiti sigud a parikut ti nasao nga ahensia, maulit-ulit laeng dagiti parikot a sangsangwen ti DepEd.//mp4
