Isinagawa ng Estados Unidos at Israel ang serye ng pag-atake laban sa Iran ngayong araw, sa gitna ng tumitinding tensyon kasunod ng ilang linggong negosasyon tungkol sa programang nuklear ng Tehran.
Kinumpirma ni US President Donald Trump sa isang video sa social media na nagsimula ang US ng isang “malawak at patuloy” na kampanyang militar laban sa Iran. Ayon sa kanya, layunin nitong pigilan ang umano’y banta ng rehimen ng Iran sa pambansang seguridad ng Amerika at wasakin ang kapasidad ng missile program nito.
Mariing itinatanggi ng Iran na militar ang layunin ng kanilang programang nuklear at iginiit na ito ay para sa sibilyang paggamit lamang. Gayunman, iniulat ng state media na naghahanda ang bansa ng “matinding pagganti.”
Ayon sa mga source, inaasahang tatagal ng ilang araw ang opensiba ng US. Samantala, tinawag ni Israel Katz ang operasyon bilang isang “preemptive strike” at nagdeklara ng state of emergency sa buong Israel.
Tinarget ng pag-atake ang mga ballistic missile at missile launcher ng Iran. Wala pang kumpirmadong ulat hinggil sa bilang ng nasawi o nasugatan.
Isinara ng Iran ang kanilang himpapawid at mga paaralan. Nakunan din ng mga bidyong na-verify ng makapal na usok sa kabiserang Tehran, habang naiulat din ang mga pag-atake sa Isfahan, Qom, Karaj, at Kermanshah.
Patuloy na mino-monitor ang sitwasyon habang tumitindi ang pangamba sa posibleng mas malawak na sigalot sa rehiyon.
