Pormalen a nangipila ti baro a reklamo a cyberlibel ken perjury ni National Security Adviser Eduardo Año ti Department of Justice (DOJ) kontra kadagiti 18 a sigud a miyembro ti Philippine Marines ken ti abogado dagitoy a ni Atty. Levito Baligod.
Kalpasan daytoy iti pannakadakamat ti naganna iti isyu ti maatap a maleta ti kwarta manipud iti mammanday-linteg a ni Zaldy Co.
Sigun kenni Año, innaklon mismo ti abogado ti panangmanipula kadagiti naisumitir nga statement dagiti sigud a marines.
Inakusaran gamin dagitoy ni Año a nakaawat daytoy iti paper bag wenno gatad ti kwarta kalpasan iti maysa a miting idiay Polo Club townhouse kadua ti sigud a mammanday-linteg a ni Zaldy Co, sigud a speaker Martin Romualdez, ken Mamamayang Liberal Representative Leila De Lima.
Inlawlawag ni Año a daytoy baro a reklamona ket personal nu idilig iti immunan nga impilana seknan iti panangiwaras iti palso a damag.
Patien met daytoy nga adda ti dua nga indibidwal a saannan nga innaganan ti adda iti likod ti panangiraman iti nagan daytoy.
Maipalagip nga idi napalabas a lawas, nangipila met laeng ni Año ti kaso kontra kada Atty, Baligod , dagiti sigud a marines, ken sigud a mammanday-linteg a ni Mike Defensor gapu iti maatap a pananglabsingda iti Article 154 ti Revised Penal Code seknan iti Cybercrime Prevention Act of 2012. //Bombo Karen Sapirao
