Rinespundean ti kapulisan ti siudad ti Baguio ti maatap a kaadda ti bomba idiay Governor Pack Road, Baguio City idi kalman, Marso 14, 2026.
Sigun iti imbestigasyon dagiti otoridad, 9:15 ti rabii idi nadiskobre ti maysa a maseknan nga indibidwal ti maatap a materyal kabayatan iti panangidispose na iti basura no sadino nakitana ti maysa a nakabati a bagahe.
Gapu ta angot gunpowder daytoy, nilukatanna ti nasao a bagahe ket immuna a nakitana dagiti wires iti uneg isu’t gapunna a dagusna nga inreport daytoy iti Fixed Visibility Point 3.
Rinmesponde met ditoy a dagus dagiti kapulisan ken kinordonanda ti nasao a pasdek.
Base iti assessment ti CECU, ti mapagduaduaan a bagahe ket naglaon iti used pyrotechnic materials ken electric match a maararamat iti fireworks display.
Naideklara met kas “clear and safe” ti Governor Pack Road , alas 11:26 ti rabii.
Naipaima ti nasao a materyal iti istasyon ti Baguio City Police Office Station 7 para iti safe keeping ken documentation.
Mannarimaan meten ti imbestigasyon ti kapulisan seknan iti nasao a pasamak. //Bombo Karen Calpoe Sapirao
