Kidkiddawen dagiti transport group, commuters, vendors, ken iti lokal nga opisial para iti pannakareporma iti polisia, karaman ti panagikkat iti buis iti gasolina ken ti panangibasura iti Oil Deregulation Act.
Naisayangkat ti nasao a kiddaw iti multisectoral forum idi Marso 21 nga inorganisar iti Piston-Metro Baguio ken ti progresibo a Tongtongan ti Umili, nu sadinno impaganetget dagiti nakipaset ti lumawlawa nga epekto iti panagngato iti presio iti langis iti sektor iti tranportasion ken ti nalawlawa a lokal nga ekonomia.
Sigun kenni Baguio City Councilor John Ray Mananeng, kritikal ti agdama a kasasaad para kadagiti drayber iti parapubliko a lugan.
Imbinglayna metlaeng ti kasasaad ti maysa a kaarubana a drayber nga agpaspasada nu sadinno, P50 laeng ti inyawidna kalpasan a binayadanna ti boundary iti lugan ken gastos iti gasolina.
Impakaamone met nga ad-adalen ita ti City Council dagiti posible nga addang tapno makessayan ti epekto iti krisis, karaman dagiti singasing nga ikkaten ti value-added tax (VAT) ken excise tax iti gasolina.
Nupay kasta, impaganetgetna ti kasapulan a long term solution.
