Itogon, Benguet- Sumangsango iti seryoso a pakaseknan iti agdama dagiti adu a komyuter iti Poblacion, Itogon, Benguet, partikular dagiti agbibiahe paturong iti siudad ti Baguio.
Sigun kadagiti pasahero, ti sigud a regular a plete iti nasao a ruta ket P32, a naingato iti P50 idi panawen ti pandemya ken nagtalinaed ti plete agingga itay laeng kallabes. Nupay kasta, idi Marso 29, 2026, kellaat daytoy a ngimmato iti P90 tunggal pasahero para iti mapatta-patta a 20 kilometro a biahe.
Gapu iti dandani doble a panagngato iti plete, impeksa dagiti komyuter ti panagdanagna, a mangibagbaga a kasla nalabes ti singir ken mabalin a saan daytoy a maitunos iti naaprobaran a fare matrix iti Land Transportation Franchising and Regulatory Board (LTFRB).
Naituding a mangipatungpal iti panagtaripnong inton bigat, Sabado, Abril 4, 2026, dagiti maseknan nga opisina ken indibidual tapno talantanen ti nasao nga isyu.
Mangnamnama dagiti naapektaran a pasahero a malawlawagan ti kasasaad ken mapanunotda ti pagimbagan dagiti driver ken komyuter.
Mainaig iti daytoy, kidkiddawen dagiti umili ken agluglugan wenno komyuter ti tulong iti maseknan tapno maipaayan iti atension ti nasao a pakaseknan ken dagos a matignay ti maseknan nga ahensia.
