Impakita dagiti ubbing nga atleta iti Kaitagi Judo Club ti kinalaingda iti Philippine Ultimate Judo Championship International Open Kids Edition a naisayangkat idi Sabado, Mayo 2, idiay Andres Sports Complex Metro Manila.
Iti baet ti kinaubingda, imparangarang dagiti judoka manipod iti Baguio ti disiplina ken kinalaingda iti teknikal, ken indauloanda ti nagduduma a division iti torneo nga inorganisar iti Ultimate Judo Fighters Club Philippines.
Iti tawenda a 9-11, nagballigi iti balitok a medalya ni Jhana Athena Aquino iti girls -32kg ken Jethro Kim iti boys -50kg.
Iti 12-14 met, nagkampeon da Nach Grant Kim iti boys -50kg ken Zack Laurence Berol iti boys -60kg.
Nangiyawid metlaeng iti silver medal da Beets Kim (boys -30kg), Ava Navalta (girls -24kg), ken Chloe Elize Maskay (girls -48kg).
Kabayatanna, nakaala iti bronze medal da Snow Diaz ken Makaveli Senires iti 6–8 division; da Caiden Lactaotao ken Grey Berol iti 9–11; ken Adam Maliaman ken Immajia Saberdo iti 12–14.
Naigiya dagitoy babaen kadagiti coaches a da Francine Rillera ken Sharon Kaybelle Diño iti naballigi a kampaniada.
