Maitantan iti agarup dua a bulan ti pannakaipasdek ti Buyog rainwater harvesting facility.
Sigun kenni Baguio City Mayor Benjamin Magalong, materminate ti agdama a contractor ti nasao a proyekto gapu na nagmanifest daytoy a saannan a kabaelan a mangituloy iti nasao a proyekto.
Inlawlawag ni Mayor Magalong nga adda ti mannarimaan a sangsangwen a karit ti nasao a proyekto, kalpasan a saanda nga inpagarup ti situasyon a nakaro a terrain ken klase ti daga gapu iti slippage.
Innayon ni Magalong a natalged dagiti residente nga adda iti asideg ti maipaspasdek a harvesting facility.
Kabayatanna, impetteng ni Mayor Magalong a nasayaat ti kwalidad ti nasao a proyekto gapu ta innaldaw daytoy nga isupsupervise ti City Engineering Office (CEO).
Impakaammona a 30% metten ti nakumpleto iti nasao a proyekto.
Gapu ta materminate ti contractor daytoy, maiparebid manen ti proyekto kadagiti interisado a mangituloy.
Sigun kenni Mayor Magalong, addu metten dagiti nangiyebkas ti interesda a mangituloy iti daytoy.
Kagiddan dayta, saan a kasapulan a manayonan ti sigud a budget para iti nasao a proyekto apaman a mai-rebid daytoy.
Maipalagip a ti nasao a rainwater harvest facility ken naipaayan ti pundo nga agarup P50 Milyon manipud iti nasyunal babaen ti local government support fund.
Iti sabali a bangir, impetteng ni Mayor Magalong a suportado dagiti komunidad iti nasao a proyekto nangnagruna ta agnumar ditoy dagiti residente ti Quirino Hill ken Pinget nangnangruna no dumanon ti summer.
Addan kapasidad nga 8K cubic per meter ti nasao a proyekto.
Manamnama met nga agleppas ti nasao a proyekto inton Oktubre ngem posible a madelay daytoy.
Nupay kasta, manamnama maileppas daytoy iti ngudo ti agdama a tawen wenno Enero inton sumaruno a tawen. //Bombo Noveh Organo
