Inlawlawag ni Benguet Vice Governor Marie Rose Fongwan-Kepes ti rason ti panagbisitada iti opisina ni Manila City Mayor Isko Moreno.
Iti pannakiuman ti Bombo Radyo Baguio kenkuana, inlawlawagna nga adda ti resolusyon nga inaramid ti Sangguniang Panlalawigan ti Benguet a mangkidkiddaw iti intervention wenno tulong tapno mailukat ti market linkages para kadagiti produkto a nateng ti Benguet.
Sigun iti opisyal, panggepda a personal nga iyuman ti nasao a resolusyon kadagiti nagduduma a mayor idiay Manila no sadino inun-unada nga inasitgan ti Manila City Mayor.
Ditoy da nga inlawlawag ti pakaseknan dagiti mannalon iti probinsya ti Benguet nga oversupply ken epekto kadakuada ti mannarimaan a krisis.
Gapu iti daytoy, sigun kenni Vice Governor Fongwan-Kepes, inpaay ni Manila City Mayor Isko Moreno ti May 11 -May 22 para kadagiti mannalon ti Benguet a mangipan kadagiti natengda idiay Manila gapu ta adda ti partikular nga area iti asideg ti City Hall daytoy no sadino maidisdisplay dagiti produkto ti nagduduma a probinsya iti pagilian.
Sigun iti bise-gobernador, inkari ni Mayor Isko ti nadakamat a petsa tapno makadisplay dagiti mannalon ken Micro, Small, and Medium Enterprises (MSMEs) kadagiti nateng, kape, weaving ken IP textiles, ken dadduma pay a produkto ti Benguet iti maysa a kondisyon- saan a nangatngato ti ipresyo dagitoy iti presyo idiay Divisoria.
Naituding a kasarita da Benguet Vice Governor Marie Rose Fongwan-Kepes dagiti accredited farmers association inton bigat (Mayo 7) para iti pamay-an nga aramidenda seknan iti impaay ni Manila City Mayor Isko Moreno nga oportunidad a maka-display kadagiti nateng ken dadduma pay a produkto inton Mayo 11 agingga Mayo 22.
Sigun kenni Vice Governor Fongwa-Kepes, kasaritada dagiti makabael a mangitulod iti produktoda idiay Manila nga ipanda dagiti natengda.
Para met kadagiti awan ti luganda, kinuna ti nasao nga opisyal a mabalinda a matulongan iti transportason wenno iti panangitulod kadagiti nateng dagitoy. //bombokaren.c.s
