Pormal a naiyawat idi laeng Lunes, Mayo 18, iti Federation of Benguet Farmers ti maysa a makina a mang-dehydrate ken mangiproseso kadagiti nateng.
Sigun kenni Atty. Samuel Gallardo, Assistant Regional Director ti Department of Trade and Industry ti rehion Cordillera, daytoy a proyekto ket para iti probinsia ti Benguet nga inisiatiba iti JCI Manila.
Ti pannakaipaay ti makina ket kasaruno ti adu a nateng a makitkitada a maibelbelleng.
Gapu iti dayta, nangipaay dagitoy iti makina a mangrisut iti pakaseknan dagiti mannalon a kas iti oversupply.
Impetteng ni Gallardo a ti nasao nga addang ket “good start” numan pay manu laeng a kilo ti kabaelan ti makina nga iproseso ngem posible a manayunan daytoy nu adu ti demand.
Kabayatanna, sigun kenni Felicitas Bandonill, Provincial Director ti Baguio-Benguet DTI-Cordillera, apaman a nasayaat ti agbalin a resulta iti inisial a proyekto ti nasao a kompania ket manamnama nga i-replicate da ti proyekto iti dadduma pay a munisipyu ti Benguet.
Impeksana nga adda metten dagiti dadduma a drying equipment kas iti panangipaay ti DTI iti freeze drying equipment kadagiti mannalon idiay Kibungan, Benguet.
Innayon pay ni Bandonill a nakitinnulong ti nasao a pribado a kompania iti maysa a logistic provider a mangiyakar iti nateng iti probinsia iti Benguet idiay Visayas ken Mindanao.
Apaman nga adda ti produkto manipod iti dehydration ken ti processing equipment ket mairaman metlaeng daytoy a maiyakar iti regular market da.
Dakkel met ti namnama ti opisial a makatulong daytoy kadagiti mannalon.
Iti sabali a bangir, nangidiaya metten ti nasao a kompania kenno Benguet Governor Melchor Diclas ti partnerhsip kalpasan a saan laeng a daytoy ti programada nu diket adu pay dagiti dadduma a programa a kas iti edukasion, serbisio, sports ken dadduma pay. | via Bombo Noveh Organo
