Ginuyugoy iti Mayor Benjamin Magalong dagiti ahensia ken pribado a kompania a suportaran ti kampania iti panagsalimetmet iti enerhiya babaen iti panangipatungpal iti “lights off” mode iti tunggal lunch break.
Karaman kadagiti addang iti lokal a gobierno iti siudad tapno makatipid iti enerhiya, a nakadatag iti Memorandum Order 74 a nairuar idi Abril 30 ket ti uppat nga aldaw a compressed workweek, panangkessay iti panagaramat kadagiti lugan, ken nasayaat nga schedule dagiti biahe tapno makessayan ti panagkonsumo iti gasolina.
Kinuna metlaeng ni Mayor Magalong nga amin a kangrunaan a silaw kadagiti opisina iti lokal a gobierno ket dagos nga iddepen iti panagdanon iti alas-6 iti rabii manipod iti Lunes agingga iti Huwebes, ken alas-5 met iti malem tunggal Biyernes, malaksid nu kasapulan para iti operasion.
Innayon pay ni Mayor Magalong a ti bassit a sakripisio ken agkaykaysa a panagtignay ket makatulong iti dakkel iti panagtipid iti enerhiya ken ti panagsango kadagiti karit iti ekonomia gapu iti agbalbaliw a presio iti lana iti world market.
