Impakaamo ni Retired Supreme Court (SC) Associate Justice Adolfo Azcuna a mabalin a matiliw ni Senador Ronald dela Rosa kalpasan a saan a pinatgan iti Korte Suprema ti kiddaw daytoy a temporary restraining order (TRO) kontra iti panangipatungpal iti warrant manipod iti International Criminal Court.
Nupay kasta, kinuna ni Azcuna a nasaysayaat nu urayen paylaeng ti pangngeddeng iti Korte Suprema iti kangrunaan a ligal nga isyu sakbay a maipaay ni Dela Rosa iti ICC.
Inlawlawag iti Korte Suprema a saan pay a daytoy a narisut dagiti kangrunaan nga isyu, karaman ti maipapan iti panangipatungpal dagiti opisial iti Pilipinas ti ICC warrant uray awan ti local warrant ken iti baet ti panagikkat iti pagilian iti Rome Statute.
Sumangsango ni Dela Rosa iti warrant seknan iti mapapati a crimes against humanity iti kampania kontra iti iligal a droga manipod idi 2016 agingga idi 2018.
