Impakaamo iti City Environment and Parks Management Office (CEPMO) a kaaduan kadagiti pamilia ken nagannak dagiti naitabon iti parapubliko a sementeryo iti Baguio City a maapektaran iti panangibangon iti access road paturong iti baro a Baguio City Jail male ken female dormitories ket pabor iti panggep a relocation dagiti nitso.
Sigun kenni CEPMO head lawyer Rhenan Diwas, suportado dagiti naapektaran a pamilia ti panangiyakar kadagiti bangkay la kitdi nalawag a relocation site daytoy ken maipaayan iti umdas a panawen tapno maisayangkat ti bukodda a ritwal sakbay a maiyakar dagitoy.
Kinunana a nasurok kagudua dagiti naapektaran a pamilia ti nakikoordinar iti opisina tapno maipaayan iti briefing seknan iti proyekto, gapuanan tapno rugianen iti lokal a gobierno ti panagsagana ken panangilatang iti pondo para iti konstruksion iti access road.
Nupay kasta, inlawlawag ni Diwas a saan pay a dagos a maipatungpal ti proyekto gaputa naikabil paylaeng daytoy iti singasing a budget ken annual investment plan iti siudad para iti sumaruno a tawen.
Agtultuloy met a maisaysayangkat iti konsultasion iti CEPMO, Bureau of Jail Management and Penology (BJMP), ken City Engineering Office (CEO) kadagiti naapektaran a pamilia seknan iti panggep a panangiyakar kadagiti bangkay iti dadduma a paset iti sementario.
Mapatta-patta a dumanon iti tallo gasut a nitso ti maapektaran iti proyekto a mangipaay iti dalan iti panagkumpleto iti baro a Baguio City Jail dormitories idiay Barangay San Luis, Baguio City.
