Nagballaag ti Provincial Health Office (PHO) iti Ifugao nga agtaltalinaed a karaman iti lima a kangrunaan a rason ti marikrikna iti probinsia ti hypertension wenno high blood pressure, a kadawyan a saan nga ammo ti kaaduan gaputa awan ti nalawag a sintomas daytoy.
Sigun kenni Nurse II Melaida Gahid, papapigsaen iti PHO ti information campaign iti agdama a National Hypertension Awareness Month tapno allukuyen ti publiko a regular nga agpakonsulta ken agpamonitor iti blood pressure.
Inlawlawag ni Gahid a maaw-awagan a “silent killer” ti hypertension gaputa mabalin a maaddaanen daytoy ti maysa a tao uray awan ti marikrikna a sintomas.
Nu saan a dagos a marisut, mabalin daytoy a mangitunda iti sakit iti puso, stroke, ken pakaseknan iti kidney.
Kinunana a ti normal a blood pressure ket 120/80 mmHg, bayat ti Stage 1 hypertension ket adda iti 130–139/80–89 mmHg ken ti Stage 2 ket 140/90 mmHg agpangato.
Karaman kadagiti risk factor iti hypertension ket ti taraon a nataba ken naapgad, kinakurang iti ehersisio, stress, panagsigarilio, nakaro a panaginum iti arak, ken pannakaadda iti diabetes wenno sakit iti kidney.
Pinalagipan metlaeng ti PHO ti publiko a suroten ti healthy lifestyle a kas iti pannangan iti nateng, regular nga ehersisio, panangliklik iti bisyo, ken regular a panangpakonsulta iti doktor tapno makontrol ti altapresyon.
