Impakaammo ti Baguio City Social Welfare and Development Office (CSWDO) nga agtuloy ti panangipaay iti social services kadagiti residente ti siudad kagiddan iti roll out ti rice assistance program nga agatad iti P56 million iti sidung ti programa ni President Ferdinand Marcos, Jr. a Local Government Support Fund (LGSF).
Panggep ti nasao a programa a mangipaay iti tulong iti agarup 33,939 a pagtaengan manipud iti vulnerable sectors.
Naituding a maipaay dagiti bagas agingga iti bulan ti Oktubre iti agdama a tawen.
Sigun kenni CSWDO Officer Liza Bulayungan, ti nasao a rice aid ket babaen iti National Food Authority (NFA).
Dinakamat pay ni Bulayungan a mannarimaan ti pannakaipaay ti 8,400 a sako ti bagas bayat a ti second batch ket naituding a maipaay iti bulan ti Hulyo.
Target ti nasao nga opisina a makumpletoda ti pannakaiwaras ti bagas iti agarup 33,939 a pagtaengan agingga iti bulan ti Oktobre iti agdama a tawen.
Maipapakaammo met kadagiti benepisyaryo a makikoordinarda kadagiti barangay officials dagitoy para iti release schedule ken urayenda ti petsa ti panangipaay kadagiti nasao a bagas.
Kabayatanna, inlawlawag ti CSWDO a maipaay ti nasao nga assistance tunggal household, saan a indibidual. //bombokaren.c.sapirao
