Maiparparangarang iti baro a datos a dandani kagudua kadagiti ina iti rehion Cordillera ket saanda a kayat a manayonan pay a maaddaan iti anakda, banag a tumultulong a mangilawlawag iti agtultuloy a panagbaba iti birth rate iti rehion.
Sigun iti Philippine Statistics Authority (PSA) iti maysa a briefing idi kalman, Mayo 26, dagiti ina iti Cordillera ket naaddaan laeng iti average a 1 agingga 2 nga anak, wenno katukad iti 1.7 nga anak iti tunggal ina.
Maibasar iti 2025 regional demographic and health survey, 46.1% nga addaan iti asawa a babbai iti rehion Cordillera nga agtawen iti 15 agingga iti 49 ket saanda a kayat a maaddaan pay iti kanayunan nga anak.
Nangatngato daytoy nu idilig iti 40.5% idi 2022, sigun kenni Imelda Buyyucan, Philippine Statistics Authority statistician iti probinsia iti Benguet.
Naipakita metlaeng iti report ti in-inut a panagbaba iti fertility rate iti Cordillera manipod pay idi 1993, nu sadinno daytoy ket dumanon iti 4.1 nga anak iti tunggal babai. Iti agdama, kaaduan kadagiti ina ket agtawen iti 20-24 (millennials ken Gen Z), 25–29, 30–34, ken 35–39 (borderline Gen X).
Innayon pay ni Buyucan a kadagiti babbai nga awanan iti anak, ti porsiento dagiti saanda a kayat a maadaan iti anak wenno kusa a maipasidong iti sterilization ket ngimmato bassit manipod iti 2.1% idi tawen 2017 agingga iti 3% idi 2025.
Kadagiti addaan iti maysa nga anak, dagiti saanna a kayat a mangnayon iti anakda ket ngimmato manipod iti 12.4% agingga 31.9%.
Kabayatanna, sigun kenni Reynaldo Wong, direktor iti Commission on Population and Development iti Cordillera, nu agtuloy ti nadakamat a trend, posible a ti rehion—nga addaan iti 1,808,985 a populasion maibasar iti 2024 census—ket agbalin a kabassitan a populasion iti pagilian iti panagdanon iti tawen 2035.
