Imbinglay ti maysa a coach a nagbalin a nasayaat ti performance dagiti atleta gaputa agtultulnog dagitoy iti game plan a naisagana para kadakuada.
Iti pannakiuman iti Bombo Radyo kenni Arnold Oglayon, coach iti Taekwondo Cordillera iti Palarong Pambansa 2026, kinunana a nakagun-od iti medalya iti Team Cordillera iti individual poomsae, team poomsae, ken freestyle poomsae.
Sigun kenni Oglayon, agbalballigi dagiti atleta gaputa ammuda ti agdengngeg ken adda ti talekda iti coach. Innayonna pay a dakkel a banag metlaeng ti suporta ken talek dagiti nagannak dagiti atleta.
Kinuna metlaeng iti opisial a ti standard-na iti panangisuro ket saan laeng a panglokal nu diket pang-international, nu sadinno mapapati a nakapagprodyus metlaeng dagitoy kadagiti kameng iti Philippine Team. Impettengna a daytoy ti mindset-na kas maysa a coach isut gapuna nga agtultuloy a makipaspaset kadagiti seminar ken mangipatpatungpal iti training updates tapno ad-adda pay a masuruan ken lumaing iti panangisurona.
Kabayatanna, impeksa ni Oglayon nga agtultuloy metlaeng ti panagsanayna kadagiti baro nga atleta, nangruna nu adda dagiti sumagmamano nga atleta nga al-alaen iti dadakkel a pagadalan babaen iti scholarship programs.
Daytoy ti sungbat idi nadamag nu anya ti mariknana tunggal adda dagiti atleta a sinanayna manipod Cordillera, partikular iti poomsae, nga al-alaen iti dadduma a rehion.
Inaklon ni Oglayon nga aglalaok iti riknana iti nasao a kasasaad gaputa numan pay proud daytoy iti balligi dagiti atleta, napanunotna metlaeng a mabalin daytoy a kalaban kadagiti sumaruno a pasalip.
