Imbinglay ni Mr. Edgar Madlaing, Cordillera Sports Coordinator a nupay binmaba ti ranggo ti Cordillera iti kalkalpas laeng a Palarong Pambansa, impettengna a dakkel latta ti potensyal a bumawi ti nasao a rehiyon inton sumaruno a tawen.
Sigun kenkuana, manipud iti Rank 9 idi napalabas a tawen, binmaba iti Rank 15 ti Cordillera Fearless Highlanders no sadino, manipud iti 17 golds a nagun-od ti rehiyon idi napalabas a tawen, 13 gold medals ti naala ti rehiyon ita a tawen.
Nupay kasta, imbinglay ni Madlaing a nginmato ti ranking ti Fearless Highlanders nu maipapan iti silver and gold medals.
Sigun kenkuana, implikasyon daytoy a mabalin ngumato ti ranggo ti rehiyon Cordillera inton sumaruno a tawen.
Dinakamatna pay a ti kaaduan a kotributor ti gold medal ti rehiyon Cordillera ket manipud iti sport a Taekwondo no sadino nakaala ti rehiyon iti lima a balitok a medalya.
Sumaruno ditoy ti archery a nakagun-odan ti rehiyon iti uppat a balitok a medalya.
Sigun keni Madlaing, ubbing paylaeng dagiti nakipaset nga atleta ita a tawen isu’t gapunna a mabalin pay a sumaysayaat dagiti performance dagitoy.
Mainaig iti dayta. . .
Imbinglay metlaeng ni Mr. Edgar Madlaing, Cordillera Sports Coordinator a nagbalin a dakkel a karit kadakuada ti conditioning, panag-adjust ken panagsagana para iti Palarong Pambansa 2026 a naangay idiay Agusan Del Sur.
Sigun kenkuana, immunadan a pinanggep nga agturong kuma iti venue maysa a lawas sakbay ti opisyal a panagrugi ti Palarong Pambasa.
Nupay kasta, naapektaran ti panagrubuatda gapu iti panagngato ti airfare. Nafully book metlaengen dagiti barko a mabalinda kuma a pagluganan paturong idiay Agusan Del Sur.
Gapu iti daytoy, naapektaran ti panagsagana ken panggep kuma a panagsanay dagiti atleta maysa a lawas sakbay iti panangrugi dagiti sports events.
Nupay kasta, impannakel ni Madlaing ti nagbalin a performance ti Fearless Highlanders ita a tawen ken namnamaen daytoy nga inton sumaruno a tawen, mapangato pay ti ranggo ti nasao a rehiyon. //bombokaren.c.sapirao
