Agtultuloy ti pannakaipatungpal ti dredging ken panaglinis kadagiti kanal iti Munisipyo ti La Trinidad kas panagsagana iti panagtutudo.
Sigun kenni La Trinidad Mayor Roderick Awingan, aktibo ti amin a maseknan nga ahensya kas iti Barangay, Munisipyo, ken MDRRMO kasta meten ti MENRO iti declogging ken dadduma pay nga aktibidad tapno maliklikan ti panaglayos.
Impeksa ti Mayor nga iti agdama, temporaryo a maisayangkat daytoy bayat a maururay ti panangirugi ti konstruksyon dagiti drainages.
Innayonna a nailatangen ti pondo para iti panakatarimaan dagiti drainages idiay Palmaville agingga Bolo Creek ken dadduma pay no sadino aggatad daytoy iti agarup P20 Milyon manipud Local Government Unit, Department of Public Works and Highways, ken Provincial Government.
Malaksid iti dayta, manamnama pay a mapondoan ti pannakatarimaan ti drainages idiay Bayabas, Pico, La Trinidad.
Nakikoordinar metten dagitoy kenni DPWH Secretary Vince Dizon para iti pannakatarimaan ti Balili River kangrunaan iti magapo iti Bolo Creek.
Iti agdama, mannarimaanen ti pannakabukel ti project drainage master plan.
Impetteng met ni Mayor Awingan a saan dagitoy nga agsardeng agingga masolusyonan ti parikot ti panaglayos iti nasao a munisipyo. //Bombo Noveh Organo
