Inmannamong ni sigud a Senate President Franklin Drilon ti posisyon ti Gatchalian bloc iti panagaramatda iti 1949 Supreme Court ruling tapno makabukel ti qourum iti senado iti tengnga ti tensyon iti liderato.
Sigun gamin iti desisyon ti Korte Suprema iti Avelino v. Cuenco, saan a nakabasar ti pakabuklan a bilang a 24 ti qourom nu di ket iti bilang dagiti senador nga adda iti hurisdiksyon ti senado.
Inlawlawag ni Drilon a ti nasao a prinsipyo ket naaramat metlaeng idi 2015 iti maysa a sesyon ti senado nga indauloan daytoy no sadino saan daytoy a kinontra da Senator Alan Peter Cayetano ken Sen. Pia Cayetano.
Iti interpretasyon met ti Gatchalian bloc, saandan nga inraman iti bilang ti quorum dagiti senador nga awan iti hurisdiksyon ti senado kas kadagiti adda iti pagbaluda wenno dagiti senador a saan a makikokoordinar iti senado.
Gapu iti daytoy, inbasar ti mayorya ti qourum iti nabatbati a senador a mabalin a maobliga nga umatendar iti sesyon.
Nupay kasta, nainget a pinaglibakan ti Cayetano bloc ti nasao nga interpretasyon ken impettengda a kasapulan a mabukel ti qourum maibasar iti pakabuklan a bilang dagiti senador a 24. //bombokaren.c.sapirao
