Kidkiddawen ti Department of Health-Cordillera (DOH-CAR) kadagiti residente nga agkaykaysa iti panangpaksyat iti dengue ken impaganetgetna a saan nga umdas ti panangdalus iti sumagmamano a pagtaengan laeng tapno malapdan ti panagadu iti lamok a mangaw-awit iti sakit.
Sigun kenni Alexander Baday, Entomologist III iti DOH-CAR, ti dengue prevention ket responsibilidad iti komunidad gaputa kabaelan nga agtayab iti dengue-carrying mosquitoes iti agingga iti 300 metro manipod iti nagitloganna.
Kas paset iti panangrambak iti Dengue Awareness Month, isaksakad iti DOH Cordillera ti aggidan a clean-up drive tapno maikkat dagiti pagitlogan iti lamo.
Kinunana a napateg a dadaelen dagiti itlog ken larvae iti lamok sakbay pay daytoy nga agbalin a lamok a mabalin a mangiwaras iti sakit.
Dagiti itlog ti lamok ket mabalin a mabiag iti agingga iti walo a bulan nga awanan iti danum ken napartak a mapissa nu mabasa manen.
Gapu iti daytoy, indagadagna ti publiko a kuskusin ken pamagaan dagiti pagkabilan iti danum ken ipasigurado a nakaluban dagitoy.
Impaganetgetna a ti dengue ket maysa a pangta iti tawen, isut gapuna a napateg ti agkaykaysa a panagtignay tapno maliklikan ti panagwaras iti sakit ken mapagtalinaed ti “zero dengue deaths” babaen iti panangliklik iti panagdu dagiti lamok.
