Kinumpirmar dagiti otoridad a karaman ni American alt-pop singer ken internet personality a ni Oliver Tree kadagiti pimmusay kalpasan a nagbinnangga ti dua a helicopter idiay Brazil idi June 14, 2026.
Karaman ni Tree kadagiti innem a pasahero ti maysa a helicopter nga agpapada a pimmusay.
Sigun kadagiti otoridad, saan paylaeng a pormal a mabigbig dagiti bangkay gapu iti nakaro a pannakauram dagitoy.
Iti inisyal nga imbestigasion, nagbinnangga dagiti dua a helicopter kabayatan ti panagtayap dagitoy iti tangatang.
Maysa kadagiti helicopter ti timmama iti parking lot a nangitunda iti pannakauram dagiti agarup 20 a lugan bayat a ti maysa ket nasarakan iti 100 a metro ti kaadayona manipud iti natnagan ti maysa a helicopter.
Kinompirmar dagiti otoridad a lima nga indibidual ti nakalugan iti maysa a helicopter bayat maysa ket piloto laeng. Amin dagitoy ket pimmusay.
Kadua ni Tree ti Brazilian music producer, Argentine video director ken Argentine YouTuber Gaspar Prim a pagaammo iti online kas “Gaspi.”
Maibasar iti statistics manipud iti Center for Investigation and Prevention of Aeronautical Accidents (CENIPA), dumanunen iti 84 nga aircraft ti naaksidente sadiay Bazil ita a tawen a nakatayan ti 25 a tattao malaksid iti kaudian nga insidente.
