Inlawlawag ni Wilson Bumay-et Jr., Presidente iti Jeepney Federation iti Baguio-Benguet, dagiti riri iti komyuter maipapan iti plete iti dadduma a jeepney iti siudad ti Baguio.
Iti pannakiuman iti Bombo Radyo, kinuna ni Bumay-et Jr. nga agtultuloy ti panagmonitorda iti nasayaat a panangimplementar iti plete ken napaneknekanda met nga ipatpatungpal dagiti drayber ti minimum fare a P15 iti umuna nga uppat a kilometro ken kanayunan a P2 iti tunggal sumaruno a kilometro.
Sigun kenkuana, napateg a makipartisipar iti publiko kadagiti public consulatiuon kadagiti barangay tapno mailawlawag kadakuada dagiti pakaseknan ken isyu maipapan iti transportasyon.
Kabayatanna, narikna met iti grupo ti trapiko iti siudad iti panagsubli dagiti estudiante iti klase rason tapno irekomendarda iti maseknan a saan kuma a mapalubosan dagiti cargo trucks iti oras iti “rush hour.”
Inwaragawag pay ti nasao nga opisial nga agsubli ti regular a plete kadagiti parapubliko a lugan nu agsubli iti sigud a P60 agingga P70 ti presio iti petrolio.
Nagkiddaw met daytoy iti pannakaawat ken panagiinnanus iti nagbaetan dagiti drayber ken komyuter. | via Bombo Khey Reparip
