Imbinglay ni Raymond Paries Cabuco, ti mangibagi iti siudad ti Baguio para iti Mr. World Philippines 2026 a nakasaganan daytoyen iti umadani a kumpetisyon na.
Iti pannakiuman ti Bombo Radyo Baguio kenni Cabuco, imbinglayna ti nangrugianna iti pagaentry no sadino dinakamatna a naaddaan daytoy ti interes iti pageantry idi tawen 2023 kabayatan iti kinakolehiyona.
Sigun kenkuana, dakkel ti nagbalin a papel ti pagaentry iti panangbukelna iti kumpiyansana iti bagi.
Imbinglay ni Cabuco a managbabain metlaeng daytoy idi kinakolehiyona ngem gapu iti pannakipaset iti pageantry, adadda a napapigsa ti kumpiyansana iti bagina.
Kas panagsagana para iti Mr. World Philippines Competition, maysa kadagiti tututokan ni Cabuco ket ti diet na.
Sigun kenkuana, malaksid iti panagkararag a maysa kadagiti saanna a malipatan, kasapulan ti disiplina kadagiti ipapaunegna a makan nangnangruna ta adda daytoyen iti national stage.
Malaksid iti dayta, dinakamatna a kasapulan metlaeng a mentally prepared daytoy isu’t gapunna nga adaddalenna metlaeng dagiti mapaspasamak iti uneg ti pagilian wenno dagiti recent events.
Inyebkasna met ti panagyamanna gapu iti panangipaay ti nasao nga oportunidad kenkuana.
Sigun kenkuana, saan unay daytoy nga agnerbyos gapu ta ammona a nakasuporta dagiti taga-Baguio kenkuana.
Iti udina, iyebkasna a nakasaganan daytoy para iti nasao a kompetisyon. Innayonna a saanna a maikari ti korona ngem ikarina nga aramidenna amin a kabaelanna iti nasao a kompetisyon. //bombokaren.c.sapirao
