Kiniddaw dagiti sumagmamano a progresibo a grupo iti Office of the Ombudsman a mangipiladan iti kaso kontra kenni Senador Joel Villanueva ken dagiti dadduma a karaman iti flood control scandal.
Iti protesta nga insayangkat ti Samahan ng Progresibong Kabataan (SPARK) iti opisina ti Ombudsman, impettengda a nasurok dua a lawasen ti napalabas manipud idi inwaragawag ti Ombudsman Jesus Crispin Remulla a nakasaganan ti pannakaipila ti plunder case kontra iti senador.
Sigun kenni SPARK PUP Coordinator John Christian Anceta, pagdandanaganda a nairana ti pannakaitantan ti kaso iti panagparang ni Villanueva iti special session nga idadaulwan ti Majority bloc.
Impeksa ti grupo ti danagda a posible nga agdudua ti Ombudsman a mangipila iti reklamo wenno nalag-an ti ipilada a kaso.
Gapu iti daytoy, kikiddawen dagiti raliyista a pagsungbaten ti Ombudsman iti maatap a panangibuntogda iti proseso.
