Agarup uppat a pamilya manipud kadagiti apektado iti pannakademolish dagiti pagtaengan idiay Naguilian Road, Quezon Hill Proper, Baguio City ti binigbig ti City Social Welfare and Development ti kwalipikado iti assessment da kas ‘homeless ‘ ken ‘underpreviliged’ kas paset ti Urban Development and Housing Act of 1992 wenno iti RA 7279.’
Sigun kenni Engr. Donald Gas-ib, dadaulo ti Investigation and Demolition Division ti City Buildings and Architecture Office (CBAO), ti RA 7279 ket ti panangipaay iti gatad wenno assistance kadagiti makapasa iti assessment no sadino ti nasao a gatad ket katukad iti agdama a minimum wage ken mai-multiply iti 60 nga aldaw.
Inlawlawagna a ti mangipaay ti nasao a gatad ket ti mismo a nagpademolish.
Iti agdama, adda pay ti nabatbati nga 80% a mademolish iti nasao a lugar apaman a makaawat dagitoy iti order.
Impeksa ni Gas-ib nga iti agdama, temporaryo pay laeng a naipasardeng ti demolition order kas inbilin ti City Mayor’s Office kalpasan a napatgan ti Motion for Reconsideration dagiti 21 a pamilya a narugyan a nademolish ti pagtaenganda.
Kabayatanna, inlawlawag ni Gas-ib nga idi tawen 2023 pay ti umuna a negosasyon dagiti respondents ken complainant seknan iti nasao nga isyu no sadino maysa nga issue ket ti gatad a kayat ti makinkukua iti lote no sadino adayo a dadakel ti presyona iti kayat dagiti residente.
Impeksana nga iti met benneg ti CBAO, nupay ti mandato dagitoy ket ti agdemolish, saan a kayat a sawen daytoy, maiyemplementar daytoy a dagos.
Sigun kenkuna, dumalan pay daytoy iti umno a proseso ken maipatungpal laeng ti nasao a demolisyon iti worst case scenario.
Innayonna pay a nu mabalbalin, maipaayan ti gundaway dagiti partido nga agsarita ken agnegotiate.
Kabayatanna, inyunayunayna nga awan ti karbengan ti urban poor a mangipaay iti lote a saan met a nainagan kadakuada malaksid nu daytoy ket nakanagan kadakuada.
Sigun kenkuana, ti laeng makinkukua ti adda karbenganna a mangilako wenno mangipatakder iti estraktura iti nasao a lote.
Ti mensahe ita ni Atty. Gas-ib, ‘saan nga agbalay no saan mo a lote’.
Inlawlawagna a saanda metlaeng a mangipaay iti relocation wenno lote a pagakaran dagiti squaters gapu ta posible a maengganyo laeng ti publiko nga agbalin kitdi nga squater. // Bombo Noveh Organo
