Manarimaan ti imbestigasyon ti kapulisan nangruna ti tinurung ti suspek a nagpammarang kas staff member ti Cathedral Church tapnu mangloko ken makaitaray ti kwarta.
Maibasar iti report dagitoy, napasamak ti insidente iti maysa a merchandise sadiay Session road, Baguio city idi June 21, 2026.
Inreport daytoy ti 23-anyos a babae, residente ti Irisan, Baguio city ken maysa a college student a part time saleslady ti nasao a merchandise.
Iti initial nga imbestigasyon ti kapulisan, immuneg ti suspek a babae a nakabado ti nangisit ken nakaawit ti nangisit a sling bag.
Nagpa-amammo daytoy a maysa nga staff ti nasao a simbaan ken nagdamag nu kasapulan dagiti agilaklako ti nasao a merchandise ti barya.
Gaputa possible a maaramat ti nasao a kuarta a pangbarya kadagiti customerda, inted ti 24-anyos a maysa metlaeng a saleslady ti gatad a P19,000.00 iti biktima.
Binilin pay ti babae ti biktima a kadwaanna ti suspek nga apan iti simbaan tapnu agpabarya wenno alaen ti kuarta.
Nupay kasta, apaman a nakadteng dagitoy ti agdan paturung iti simbaan, adda ti inawagan ti suspek babaen ti Cellpone a mapapati a kakutchaba daytoy.
Kalpasan ti panagsarita ti suspek ken ti katawagna, inted ti biktima ti kwarta.
Dita metten nga imbilin ti suspek nga agturung ti biktima iti upper level ti simbaan a pangalaanna iti kuarta.
Nupay kasta, awan ti tao a nadanunan ti biktima a tao iti lugar a naibilin a pagsabatanda iti mangited ti barya.
Gapu iti dayta, dagus a nagsubli ti biktima iti pagtagilakuan apaman a na-realize na a naloko daytoy.
Nupay kasta, nakapanawen ti suspek idi nabirepekar ti napasamak nga insidente.//Bombo Noveh Organo
