Nangiruar ti Commission on Audit (COA) iti unmodified opinion para iti financial statements iti Office of the Vice President (OVP) idi tawen 2025, a mangipasimudaag a naisagana ken naisubmitir a nasayaat dagitoy kas maitunos iti accounting standards.
Sigun iti COA, naaramat iti Office of the Vice President ti 92.32% iti 2025 budget daytoy, a sigun kadakuada ket nasayaat a naimanehar ti pondo.
Daytoyen ti maikapat a nagsaruno a tawen a nakaawat iti Office of the Vice President iti unmodified opinion.
Inlawlawag iti Commission on Audit (COA) a ti audit opinion ket saan a rukod iti pakabuklan a panagsurot iti maysa nga ahensia kadagiti linteg, nu diket maipapan laeng iti nasayaat a panangisagana ken panangisubmitir iti financial statements.
Ti panagsurot kadagiti linteg ken umno a panagaramat iti pondo ket masuksukimat babaen iti nagsina a compliance ken performance audits.
Nairuar ti audit opinion sakbay ti impeachment trial ni Vice President Sara Duterte, a sumangsango kadagiti akusasion iti mapapati a saan a nasayaat a panagaramat iti pondo iti OVP.
