Naduktalan ti Commission on Audit (COA) a saan nga imbangon ti Department of Education (DepEd) ti 66% a classrooms a napondoan manipud 2021 agingga 2025 iti sidong ti Basic Education Facilities Fund (BEFF).
Maibasar iti tinawen nga audit report, kinuna ti COA a nabayagen nga ikagkagumaan ti DepEd a risuten ti kinakurang ti classroom babaen iti pannakitinnulongna iti Department of Public Works and Highways (DPWH).
Nupay kasta, saan a naaramid ti 9,450 wenno 66% kadagiti 14,267 a siled-pagadalan.
Kangrunaan a rason iti saan a pannakaipasdek dagitoy ti isyu a mainaig iti site, pannakabalbaliw ti proyekto, approval delays, school site nga awan ti titulo ken dadduma pay.
Sigun iti COA, inyakar ti DepEd ti implementasion dagiti classroom projects iti DPWH.
Nupay kasta, 4,817 laeng a siled-pagadalan, wenno 34% iti dagup a target, ti nakompleto iti uneg ti lima a tawen.
