Impaganetget ni Mayor Benjamin Magalong a napateg ti disiplina ken responsibilidad iti aglawlaw tapno mapapigsa ti disaster resilience iti siudad, nangruna iti tengnga iti pakaseknan iti panaglayos ken dadduma pay a didigra.
Iti panangrambak iti National Disaster Resilience Month, kinuna ni Magalong a dakkel ti epektona iti panagsagana ken panagresponde iti didigra ti kababalin dagiti indibidual partikular iti saan a nasayaat a panangibelleng iti basura ken panangiruar iti septic waste kadagiti kanal tunggal napigsa iti panagtudo.
Dinakamatna dagiti nasao nga aramid kas mangpakpakaro iti panaglayos ken polusion iti aglawlaw.
Kinunana a kasapulan a maimula ti disiplina iti komunidad, nangruna kadagiti agtutubo a mabalin nga agserbi kas rangtay iti panagbalbaliw iti kababalin iti pamiliada.
Imbinglayna metlaeng ti kapadasanna nu sadinno binagaan iti anakna kalpasan a nangibelleng iti biodegradable waste iti ruar iti lugan, nga impaganetgetna a maysa latta a kita iti littering wenno panagwara.
Sigun kenni Magalong, agtultuloy ti creek cleanups iti siudad a makaur-urnong latta iti dakkel a volume iti basura, kaaduan ket plastik, a mangipakpakita iti agtultuloy a karit iti disiplina iti publiko.
Kinuna met ni City Planning and Development Officer Arch. Donna Tabangin nga agtaltalinaed a kangrunaan a pakaseknan iti siudad ti plastik ken food waste nga agkasapulan iti kooperasion iti gobierno ken umili.
