Impaganetget ti kampo ni Leyte 1st District Representative ken sigud a House Speaker Martin Romualdez nga awan ti ebidensiya a mangpaneknek nga adda ti pakainaiganna iti naanomalyaan a flood control projects.
Sigun iti Office of the Ombudsman, maatap a ni Romualdez ti mastermind iti flood control scam.
Nupay kasta, inyunay-unay ti pannakangiwat ni Romualdez a ni Atty. Elaine Atienza nga iti laksid ti adu a panagimbestigar ti Senado, Kamara ken dadduma pay nga opisial nga imbestigasion, awan pay kadagiti agdama ken sigud nga opisial ti DPWH ti nangbigbig kenni Romualdez a nakipaset iti panagplano, pannakaipatungpal, panangsukimat, panagbayad, wenno pannakairuar ti pondo para iti aniaman a maipagarup a ghost project ken dadduma pay.
Pinaglibakan metlaeng ti kampo ni Romualdez ti alegasion ti Ombudsman nga inmanipula ti House leadership ti badyet nga insagana ni sigud a Public Works Secretary Manuel Bonoan.
Sigun iti pannakangiwat ni Romualdez, ti proseso ti badyet ket pakairamanan dagiti stakeholders ken saan a maymaysa ti mangtengngel.
Inlawlawag pay ti pannakangiwat a ti aktual a pannakaipatungpal ken implementasyon ti naaprobaran a badyet ket nainget nga adda iti sidong ti mandato ti executive branch.
