Diokno, De Lima ken Cendaña, nangipila iti counter-affidavit iti reklamo nga impila ni Atty. Mans Carpio

Nangipila iti counter-affidavit iti Quezon City Prosecutor’s Office da Akbayan Reps. Chel Diokno ken Perci Cendaña, kadua ni ML Party-list Rep. Leila de Lima, seknan iti reklamo nga impila ni Atty. Mans Carpio, asawa ni Vice President Sara Duterte.

Ti reklamo ket adda pakainaiganna iti panangibutaktak iti bank records ni Carpio iti panagdengngeg iti Kamara seknan iti impeachment complaint kontra iti bise presidente.

Impaganetget ni Diokno nga inaramidda laeng ti pagrebbenganda kas kameng iti House Committee on Justice.

Kabayatanna, kinuna ni De Lima a saan a maapektaran iti nasao a kaso ti impeachment trial ni Duterte a mangrugi inton Hulio 6, bayat nga impasigurado ni Cendaña a nakasaganada a sangwen ti reklamo.