Pinirmaan ni La Trinidad Mayor Roderick Awingan ti Executive Order No. 91 itay kanikadua kas paset iti addang ti munisipyo a mangsigurado iti proteksyon ken seguridad dagiti ubbing iti nasao a munispyo.
Iti nasao a direktiba, maiparit kadagiti elementarya ken high school nga ag-tambay kadagiti nagduduma nga establisyemento iti munisipyo.
Daytoy ket kalpasan a nakaawat dagitoy iti report ti panagbulbulakbol dagiti ubbing sadiay.
Gapu iti daytoy, binilin ni Mayor Awingan amin a business establishments a saanda a palubosan dagiti estudyante manipud iti publiko ken pribado a pagadalan nga ag-tambay dagitoy kadagiti masakupanda manipud alas-otso ti agsapa agingga alas-singko ti malem malaksid laeng nu kadua dagitoy dagiti parentes, guardian, wenno school employees.
Dagiti aglabsing iti daytoy a direktiba ket dagos a mamulta iti ₱500 para kadagiti first offender, ₱1,000 iti second offense ken ₱2,500 iti third offense.
Nabilin metten dagiti Law enforcement, barangay officials, ken dagiti na deputized a Barangay Peacekeeping Action Teams (BPATs) tapno imonitorda ti pannakaipatungpal ti nasao a direktiba.
Panngep ti nasao a direktiba a maliklikan ti unexcused absences dagiti estudyante.
Kagiddan dayta, palagip metlaeng daytoy kadagiti business owners kadagiti responsibilidad da a mangsuporta iti pagsayaatan ti edukasyon iti nasao a komunidad. //bombokaren.c.sapirao
