Impetteng ti House prosecution panel a krimen ken impeachable offense ti statements ni Vice President Sara Duterte a nakakontrata iti hitman a mangpapatay kada President Ferdinand Marcos Jr., First Lady Liza Araneta-Marcos, ken sigud nga Speaker ken Leyte 1st District Rep. Martin Romualdez.
Kinumpirmar daytoy ni Private prosecutor Amando Virgil Ligutan kalpasan a dinamag ni senator-judge Risa Hontiveros no maibilang a criminal act ti statement ti bise presidente iti video nga impresenta ni National Bureau of Investigation (NBI) Senior Agent Mark Calilung.
Sigun kenni Ligutan, maibilang daytoy a krimen isu’t gapuna nga impila ti NBI ti reklamo iti Department of Justice.
Dinakamat pay ni Ligutan ti Rule 130, Section 35 ti Rules of Court, nga inkalinteganna a dagiti pagsasao ni Duterte ket mangipakita iti panggepna a mangpapatay iti Presidente, First Lady ken sigud nga Speaker of the House.
Kabayatanna, impaayan ni Senate impeachment court presiding officer Senator Francis Escudero ti depensa a mangilawlawag no apay a saan a maibilang kas impeachable offenses ti statement ti bise presidente.
Sigun kenni Defense counsel Carlo Narvasa, nasaysayaat a sungbatanda daytoy kalpasan ti cross-examining ni Calilung, banag a pinatgan ni Escudero.
