Kailangan nang magsumite ng waste management program ang mga organizer ng pampublikong kaganapan na gagamit ng mga lugar ng pamahalaan sa Baguio bago mabigyan ng permit.
Ayon sa Ordinance No. 63-2026 o “Event Waste Management Ordinance of Baguio City” ni Councilor Yuri Weygan, layunin nitong palakasin ang kalinisan, pangangalaga sa kapaligiran, at kalusugan ng publiko.
Inaatasan ang mga organizer ng parada, pista, konsiyerto, palaro, at iba pang aktibidad sa pampublikong lugar na maghanda ng plano para sa segregasyon, pangongolekta, pagtatapon ng basura, pagtatalaga ng waste marshal, at paglilinis matapos ang kaganapan.
Ang mga lalabag ay pagmumultahin ng P2,500 hanggang P5,000 depende sa bilang ng paglabag, bukod pa sa pansamantalang pagsususpinde ng kanilang karapatang kumuha ng event permit.
Naipadala na ang ordinansa kay Mayor Benjamin Magalong para sa paglagda at publikasyon bago ipatupad.
Samantala, hinikayat ng pamahalaang lungsod ang mga tindero sa pampublikong palengke na kusang tumulong sa paglilinis matapos ihinto ang rat-catching contest. Sa halip, nais ng lungsod na panatilihin ng mga vendor ang kalinisan at alisin ang mga pinagmumulan ng pagkain ng mga daga.
Ayon kay Daryl Kim Longid ng Public Order and Safety Division, layunin ng dating paligsahan na mahikayat ang mga tindero na panatilihing malinis ang palengke, habang ang premyong pera ay nagsilbing insentibo lamang.
