Posible a mapilaan manen iti kaso ti maysa a restaurant a mangiserserbi iti karne ti aso idiay Puguis, La Trinidad, Benguet kasaruno ti panagturong ti sumagmamano a kameng iti dua a government agency a nangan iti nasao a lugar.
Iti report a nakalap iti Bombo Radyo kenni Atty. Amadeo Degay iti alas-12 idi Hulio 6, nagturong dagiti kameng manipod iti dua nga ahensia iti gobierno tapno mangan iti nasao a restaurant.
Apaman a nagtugaw dagitoy, dagos a naiserbian dagitoy iti lima a sabaw nu sadinno inladan ti server a dua kadagiti sabaw, a naikabil iti green cup, ket sabaw iti baka bayat a ti tallo a baso iti sabaw, a naikabil iti brown cup, ket sabaw iti karne iti aso.
Nag-order ti nasao a grupo iti tallo a “serving” iti baka ken dua a “serving” iti pulutan.
Idi naiserbi ti order kadakuada, nadlawda a ti “pulutan” a kiniddawda ket kasla karne iti aso.
Kinnanda ti karne ti baka ngem saanda a pinagan-ano ti “pulutan” gaputa panggepda nga i-take out para iti examination ken paneknekan nu karne ti aso ti nasao a “pulutan.”
Impakaamo met ti grupo ti panggepda iti management ngem nagkedked ken pinawilan daytoy dagiti staffs nga iruar daytoy.
Dita metten a maysa nga indibidual manipod iti nasao a grupo ti immawag ken nagkiddaw iti tulong manipod kenni Atty. Degay a dagos a nagturong iti nadakamat a lugar.
Kalpasan ti negosasyon, pinalubosan ti management dagiti grupo nga i-take out ti karne.
Sisasango met dagiti staffs bayat a maikabkabil ti suporta iti order iti nasao a grupo.
Naikabil iti transparent ti self-sealing plastic bag ti nasao a banag sakbay a minarkaan ken pinirmaan ti abogado.
Kalpasan ti panagsarita seknan iti rason nu apay a naipatungpal ti nasao a banag, pimmanaw metlaeng dagiti nasao a grupo kadua ti nasao nga abogado a nagturong iti La Trinidad Municipal Police Station tapno iparekord ti napasamak nga insidente.
Ti mapapati a karne ti aso a nai-take out ket naiturong iti NMIS laboratory para ti DNA Analysis.
Kabayatanna, iti phone interview iti Bombo Radyo kenni Atty. Amadeo Degay, inlawlawagna nga inawagan laeng daytoy dagiti nasao a grupo tapno agpatulong.
Maibasar iti impormasyon a nakalap, nagtaud ti nasao a grupo manipod iti sabali a lugar iti munisipyu ti La Trinidad a nangsukimat kadagiti establisimiento a panganan nu sadinno, apanda laeng kuma mangan iti nasao nga establisimiento ken nagdamag laeng agingga a napasamak ti nasao nga insidente.
Ti grupo ket addaan iti mission order karaman ti routine inspection kas iti panagsukimat kadagiti karne kadagiti establisimiento, merkado, transport vehicle kas panagtulnog iti sanitation ken hygiene standards; panangisayangkat iti surveillance a mangmonitor ti kasasaad ken panaglako iti meat products; ken ti search and seizure nu sadinno matiliw ken makumpiskar dagiti “hot meat.”
Maibasar iti sidong ti Meat Inspection Code of the Philippines, ti karne ti aso ket maibilang iti kategoria a “hot meat” ken naklasipikar kas non-food animals.
Ti hot meat ket termino iti aniaman a karne wenno carcass nga “illegally sourced,” saan a nasukimat, ken saan a mailako iti publiko gaputa saan a naipasidong iti safety checks a mangipapaay iti risgo kadagiti konsyumer wenno mangan.
Nakalanad iti Meat Inspection Code of the Philippines a ti karne ti aso ket saan a masuksukimat ken saan nga aprubado tapno agserbi a taraon kadagiti tattao.
Maiparit metlaeng ti illegal trade.
Maipalagip nga idi napalabas a bulan, napilaan ti nagduduma a kaso iti kapada a restaurant gapu iti panangiserbida iti karne ti aso. Naballaagan pay daytoy ngem saanda nga insardeng ti panangiserbi ti karne ti aso.
Iti agdama, awan pay ti komento ti nasao a restaurant seknan iti nasao a banag. | via Bombo Noveh Organo
