Inwaragawag ti Department of Health (DOH) a nakasangpetten iti pagilian ti 455,188 a bote ti anti-retroviral (ARV) bottles.
Maaramat daytoy iti pannakataming dagiti Persons Living with HIV (PLHIV).
Iti social media post ti DOH, naituding a maiwaras ti Lamivudine+Tenofovir+Dolutegravir (LTD) iti nadumaduma a heath center iti pagilian intun sumaruno a lawas.
Sigun iti ahensiya, insayangkatda ti inspeksyon kadagiti ARV drugs no sadino, kinunada a natalged, epektibo, high-quality ken nakarehistro iti Food and Drug Administration.
Kabayatanna, manamnama a sumangpet intun Agusto ken Setiembre 2026 ti maikadua ken maikatlo a tranches.
Immuna nga inwaragawag ti DOH nga impaay ti supplier a Phil Pharmawealth ti 1.2 million a botelia ti LTD.
Maipalagip a naituding a maipaay ti umuna a batch ti nasao nga agas idi napalabas a Mayo.
Nupay kasta, kiniddaw ti supplier ti pannakaitantan daytoy gapu iti krisis sadiay Middle East.
Sigun kadagiti eksperto, ti LTD ti mairekomendar a first-line antiretroviral regimen para iti pannakataming ti HIV.
Impanamnama met ti DOH nga umdasen ti agarup 1.1 million a botelia ti LTD a mangsuporta iti pannakaagas ti mapattapatta a 97,000 a PLHIV iti intero a pagilian.
