Agtultuloy latta ti monitoring ti City Disaster Risk Reduction and Management Office (CDRRMO) iti epekto ti naglabas a bagyo a ni Inday.
Kagiddan dayta, sigun iti nasao nga opisina, awan met ti nairekorda a bilang ti evacuation manipud kadagiti babbarangay kasta metten nga awan ti naireport a water supply disruption, electricity outage, ken telecommunications service disruption.
Awan metlaeng ti naireport a nadadael a pagtaengan- partial man wenno totally destroyed.
Nupay kasta, natumba wenno nadadael ti agarup 11 a kayo iti paset ti Leonard Wood, Kisad Road, Pucay Village, Quezon Hill, Camp 7, Insular, Cooyesan, Kennon Road, Gov. Pack Road, Upper Quezon Hill ken Tiptop.
Adda metlaeng ti dua a bilang ti landslide, erosion wenno rockfall idiay San Luis Village ti paset ti Dahlia Street ken iti asideg ti San Luis Village Barangay Hall bayat a naireport metlaeng kadakuada ti dua a kaso ti nargaay a kabite- maysa idiay Upper Quezon Hill ken maysa idiay Maria Basa-Pacdal.
Nailistada metlaeng ti maysa a kaso ti panaglayos iti paset ti Naguilian Road idiay Irisan.
Agtultuloy a nakamonitor ti nasao nga opisina kadagit nagduduma a lugar iti siudad. //bombokaren.c.sapirao
