Agtaltalinaed a natalged ken naurnos ti Barangay San Roque, Baguio City uray awan ti barangay tanod dagitoy manipud pay idi 2010.
Iti interview ti Bombo Radyo kenni Brgy. Captain Ernesto Amon, kinuna nga awan ti nairekord ti barangayda a krimen kadagiti napalpalabas a tawen a mangipakpakita iti panagtitinnulong dagiti umili tapno masalakniban ti komunidad.
“Ti San Roque, manipud idi, siguro 2010, 2011, 2012, awanen ti tanod mi. Awan maala mi a tanod, ngem ti maibagak laeng, uray awan tanod mi, general peaceful met ti Barangay. Awan iti crimes a mangmangyari” sigun iti Kapitan.
Impasigurado pay ti Kapitan a naranniag amin dagiti kalsada, ken no man adda mapundi a streetlight ket dagusda nga ipakpakaammo iti City Engineering Office tapno masukatan.
Innayonna pay a nakagatang met ti barangay ti innem a baro a CCTV cameras a maikabil iti nagduduma a lugar a mangnayon iti agdama a 12 a surveillance cameras iti barangay.
Impalagip met ni Amon kadagiti residente nga agtalinaed a naalerto ken makipagtinnulong tapno mapagtalinaed ti kappia ken kinatalged ti nasao a barangay.| via Bombo Khey Reparip
